{ Lub Rooj Ua Tsaug Rau Niam Txiv KAB YEEB }

1. Tua ib Qaib muab hau kom siav siav rau saum Rooj. 

2. Daus ib taig mov rau saum lub Rooj. 

3.Taws ib tug Tswm Ciab, los sis ib lub Teeb Lij Xeeb.  

4.Txiv Hmab Txiv Ntoo rau saum lub Rooj. 

5. Paj Hmab Paj Ntoos. 

6. Ib daim Nyias Hmoob. 

7. Ib cev Ris Tsho. 

8. Muab ib txoj Xov Paj, los sis ib Pob xov Paj tso rau saum lub Rooj. 

[A]. Hu Txog Rau Niam Txiv Txoov Kab Yeeb:

Peb tus Mi Ab Mos Liab, nws muaj Niag Cev Ntaj Ntsug thiab tus Ntsuj Plig, yog li ntawv Peb yuav tau ua tsaug rau Peb Hmoob Nkawm Niam Txiv Txoov KabYeeb xa Tub xa Ki thiab ua kev Cai txais tos Hu Plig rau Nws, zoo Siab Nws lo ua Peb Tub Peb Ki. Tus Txheej Txheem hu txog Niam Txiv Ntxoov KABYEEB xa Tub xa Ki muaj xw li: 

Oh Peb Hmoob Niam Hmoob Txiv Txoov KabYeeb xa Tub xa Ki os hnub no nkawm Tub nyab/ Txhais vauv (Npe:……………) txais tau Tub tau Ki lawm, Peb sauv daws puas leej zoo Siab zoo Plawv, npaj txhij npaj txhua lawm yuav ua tsaug rau Neb ua Niam ua Txiv. 

Nkawv ua Niam ua Txiv xeeb yug tau Tub tau Ki lawm yog ib tug mi Ntxhais/Tub mas, nkawv yuav Hlub, nkawv yuav ua rau Noj rau Haus, nkawv yuav muas rau Hnav tsis cia Tshaib Nqhi, nkawv yuav tsis cia Khaub Hlab nawb. Nkawv yuav muab Nws tis kom muaj Suab muaj Npe hu. Lub Npe hu ua  

( Npe: …………….). Yog li no Neb ua Niam ua Txiv sab Ntsuj Plig, Neb yuav tig ntsej muag los saib, tsom kwm Pov Fwm mi Tub/Ntxhais (Npe:……….) no, kom Nws yuav loj hlob dhia rhees tsis muaj Mob, tsis muaj Nkeeg. Neb yuav sam Koob Sam Hmoov, muab kev txawj kev Ntse cawm Nws, muab kev Dawb kev Huv ntxuav Nws, ntau mi Plig Qoob Plig Loos, Plig Tsiaj Plig Txhuv, Plig Nyiaj Plig Kub, Ncej Nom Ncej Tswv lo cob rau Nws Npab cwb rau Nws Tes, yuav lo kav Nws kom Noj tsis khee Tes haus tsis khee qub ntag nawb. Neb yuav ntau Nws mis Ntaub noj Ntawv Haus, Ntaub Caij Ntawv Nyoog kom Nws yuav lo Nyob Puv Caij Zaum Puv Nyoog puv 120 Xyoo ntag nawb. Neb yuav saib xyuas ntau Nws mi Ntaub Txij Ntawv Nkawm rau Nws. Neb yuav muab Teg Txuj Teg Qhua cawm Tub cawm Ki rau Nws yuav tau cawm Nws Tub Nws Ki nawb. 

Zoo Siab, ua tsaug ! 

#  Yog koj txawj ces koj mam hu plig rau tus Mi Ab raws li tus Laj txheej kev “Hu Plig Tau Mi Nyuam Tshiab” hu li koj paub xwb. 

#  Yog Koj tsis paub hu Plig ces Koj hais ua Nriav Lus li saum toj sauv xwb lo tau lawm, lo yog koj mus tos ib tug Niam Phauj/Txiv Plig tuaj pab koj ua kev cai txais tos thiab hu Plig rau Koj tus Mi Ab. 

{ Hu Plig Hauv Vaj Hauv Tsev }  

[A]. Hu Thiab Tsa Ntsug Tsa Plig Hauv Vaj Hauv Tsev.

Ua !...... Hnub no tsua zoo Hnub, Hnub no tsua zoo Nyoog, yog Hnub Dawb coj Hnub Huv es, Kuv yog Txiv Ntsuj Kuv Txiv Plig/ Txiv/Niam hauv Vaj hauv Tsev, yuav tuaj Nqee Ntsuj Nqee Plig, yuav tuaj cais Vij Mob Vij Nkeeg, yuav tuaj txhawb Koob txhawb Hmoov,  nqa lub Yeej Koob Yeej Huam tuaj txhawb tuaj tsa, tsa Tub tsa Ki os. 

1. Hu txog Niam Txiv Ntxoov KABYEEB xa Tub xa Ki, Niam Txiv Xwm Kav, Niam Txiv Pem Xeeb, Niam Txiv Lo Pov, lo nrog txhawb nrog tsa cawm Tub cawm Ki lau ………  

2. (Npe:……........) txawm qaug li yeev rau lub Lav mob lav Nkeeg lawm lo, Hnub no kuv yog Txiv Ntsuj Kuv Txiv Plig yuav tuaj txhawb tuaj tsa ntawm lub lav mob, kom sawv li tsees ntawm lub lav Nkeeg, ncho Cev li tho, plis li plho ntawm lub lav mob sawv tsees lo oh……..  

3. Txawm qaug rau Qab Txag rau qab Txees lawm lo, hnov nqee hnov hu ces sawv li tsees lo oh ……  

4. Txawm qaug rau Hauv tag rau hauv Plag lawm lo, hnov nqee hnov hu ces sawv li tsees lo ……….  

5. Txawm qaug rau chaw Da Dej rau chaw Ntxuav muag lawm lo, hnov nqee hnov hu ces sawv li tsees lo oh....... 

6. Txawm qaug rau Qab Vaj Tsib Taug lawm lo, hnov nqee hnov hu ces sawv li tsees lo ………. 

7. Txawm tus Siab tus Sau, Niam Txiv/ Tub Ki tsis txawj hais lus, tsis saib tsis xyuas, tau Ceeb tau Ntshai, tus Siab lawm lo, Hnub no Niam Txiv/Tub Ki lees Txim lees txhaum ces luag ntxhiav luag ntxhi sawv li tsees lo oh………. 

[B]. Mus Tos Plig Rau Kev Mus Khwv Noj Khwv Haus: 

1. Npe:…………….) os, txawm mus qaug rau nruab Liaj nruab Teb mus poob rau qab Zeb qab Cav, poob rau kev tsau Ntuj Teb tsau Nti lawm lo, Kuv yog Txiv Ntsuj Txiv Plig taws mi Tswm Ciab cig ntsa li  lug tuaj tos kom koj pom kab pom kev rov qab lo mus Vaj mus Tsev, hnov nqee hnov hu ces sawv li tsees luag li ntxhi lo oh ………. 

2. Txawm mus Poob Plig rau kev ua Da ua Zog lawm lo, hnov nqee hnov hu ces sawv li tsees lo...................  

3. Txawm mus Poob Plig rau kev tu Plaub tu Ntug tau ceeb tau ntshai lawm lo, hnov nqee hnov hu ces sawv li tsees lo .............................  

4. Txawm mus Poob Plig rau kev mus ua Lag ua Luam, khwv Nyiaj khwv Txiaj lawm lo, hnov nqee hnov hu ces sawv li tsees lo…….. 

5. Txawm mus Poob Plig rau kev mus Kawm Ntaub kawm Ntawv,  kawm Txuj kawm Ci lawm lo, hnov nqee hnov hu ces sawv li tsees lo .............................  

6. Txawm mus Poob Plig rau kev mus nkaum Paj nkaum Nruas, mus kav Kiab kav Khw lawm lo, hnov nqee hnov hu ces sawv li tsees lo lau os ............................. 

 [C]. Mus Tos Plig Rau Kab Ploj Kev Tuag: 

1. (Npe:…………….) os txawm see li yees mus rau “Kev mus Hnav Tsho Tsuj Tsho Npuag” lawm lo, Kuv yog Txiv Ntsuj Txiv Plig, nqa mi Ris mi Tsho, tsw qab li lug tuaj saws tuaj tos, hnov nqee hnov hu ces zoo Siab luag ntxhiav luag ntxhi sawv li tsees tig li lees rov lo oh ………. 

2. Txawm mus rau “Toj Kab Ntsuab Dawm Kab Ntsig” lawm lo, Kuv yog Txiv Ntsuj Txiv Plig tuaj tos, hnov nqee hnov hu ces sawv li tsees lo os ………. 

3. Txawm mus rau “Toj Tuag Tshaib Dawm Tuag No” lawm lo, Kuv yog Txiv Ntsuj Txiv Plig tuaj tos, hnov nqee hnov hu ces sawv li tsees lo oh ………. 

4. Txawm mus rau “Kev mus haus Pas Dej Iab Dej daw” lawm lo, Kuv yog Txiv Ntsuj Txiv Plig tuaj tos, hnov nqee hnov hu ces sawv li tsees lo oh ………. 

5. Txawm mus rau “Kev mus nce Ntxwg Nyoog Ntaiv Ntuj” lawm lo, Kuv yog Txiv Ntsuj Txiv Plig tuaj tos, hnov nqee hnov hu ces sawv li tsees lo oh ………. 

6. Txawm mus rau “Kev mus cuag Pog cuag Yawg”, rau npoo Luaj npoo Av lawm lo, Kuv yog Txiv Ntsuj Txiv Plig tuaj tos, hnov nqee hnov hu ces sawv li tsees lo mus Vaj mus Tsev lau os………. 

[C]. Tos los Txog Nraum Qhov Rooj: 

1. Los txog nraum Rooj tsis Ceeb tsis Ntshai os, muaj zoo Niam zoo Txiv, Tub Nyab, Ntxhais Vauv qhib Rooj Tag dav li faws cia, qhib Rooj Txuas dav li fo tos es rhais Rooj rhais Hneev zoo Siab luag ntxhiav luag ntxhi lo oh om !. 

[D]. Hu Niam Txiv KabYeeb xa Tub xa Ki Kom Pab xa Plig lo: 

1. Oh !, Niam thiab Txiv Txoov KabYeeb os Neb yog Niam yog Txiv Ntsuj Plig, Neb yog Niam yog Txiv xa Tub xa Ki, Kuv hu tsis txhij, tos tsis txog lo Neb pom (Npe:…………………) nyob qhov twg Neb pab coj nws lo ntawm no wb yuav rov mus Vaj mus Tsev nawb, Neb ua Niam ua Txiv Neb yuav tsum tau cai quas Niag Vij tsis Dawb tsis Huv, tsis pub txeem lo rau hauv Vaj, tsis pub nkag lo rau hauv Tsev nawb. 

[E]. Cob Plig Rau Tub Ki: 

1. Muab txoj Xov Paj khi rau Nws Tes, hais li no: Oh ! (Npe: ………………) Hnub no kuv yog Txiv Ntsuj Txiv Plig, mus tos tau koj mi Ntsuj mi Plig los, yuav coj lo cob rau koj tej qua Tes, cob rau koj tej qua npab os, txij Hnub no mas tsis seev kev tus siab tus Siab, tsis seev kev tus Sau lawm nawb, tsis seev kev mus nrhiav nram mab nram Suav lawm nawb. 

2. Muab lub Tsho tso rau saum nws Xub Twg, hais li no: Oh ! (Npe: ………………) Hnub no tos tau koj mi Ntsuj mi Plig lo lawm, yuav coj lo npuab koj Cev, coj lo npuab koj Duav nawb, yuav lo txhawb lo tsa koj mi Cev Ntaj Ntsug kom tsis pub qaij tsis pub qaug, kom sawv ruaj ntseg xw li ncej Zeb, kom khov ruaj khod xw li ncej Tsua lau. 

3. Muab cov Xov Paj coj mus rau Sawv Daws khi rau Nws tes, txhawb Plig thiab txhawb Koob Hmoov rau Nws, hais cov lus zoo rau Nws.  

[F]. Txhawb Plig Tub Ki: 

1. Oh Hnub no Peb qhua Vaj Tsab xeem Lis, Niam Txiv Kwv Tij Neej Tsa tuaj txhawb Ntsuj txhawb Plig nawb. Mas ib leeg txhawb ib txoj Sia os, kaum leej txhawb kaum txoj Sia Ciaj Siav ntev rau ( Nws npe:…………………) Kom yuav nyob puv caij zaum puv nyoog ntag nawb, kev mob kev nkeeg kom Xam kom Yaj mus, kom Dawb kom Huv. Mus lau ! 

‍ ‍  { Thaj Plig Txhawb Nyeej ( Cawv Xeeb ) }

[A]. Tsis Cais Plig Nyiaj Plig Kub. 

Sis os ( Npe:........................ )! Kuv txiv ntsug txiv plig leej tub SivYig, Yeej koob kuv ntoo yeej huam kuv tuav os. Kuv yuav tuaj luj lim Vij mob Vij nkeeg, kom plam ntawm koj lub nyeej os. Yuav tuaj cais Vij sub Vij sw sub tawg sub ntsha, kom plam ntawm koj mi roj mi tsa os. Yuav tuaj sam koob tsaw hmoov rau kojs tau noj tau yoom os. Yuav rub ntaub noj ntawv haus ntaub caij ntawv nyoog rau koj ( Npe:…….........……………..) no es: 

1). Kuv cais no yuav tsis cais koj mi plig tub plig kis, yuav cia nyob txhawb koj mis meej mom fwj chim kom nyob luag ntxhi. Tsis cais koj mi ntsuj duab ntsuj hlaus, yuav cias nyob txhawb koj das koj zog mus ib txhis laus. Tsis cais koj mi ntsuj duab ntsuj mam, yuav cia txhawb koj mis cev ntaj xib ntsug kom pob ntsej hnov lus zoo qhov muag pom pov kev huv si li kha os. 

2). Tsis cais koj plig nyiaj plig kub, yuav cia nyob txhawb koj tej tub tej kis kev mus kawm txuj os. Tsis cais koj rooj nqaig rooj hno, yuav cias nyob ntxiv yuav cia nyob txhab zog. Tsis cais koj ntaub txij ntawv nkawm, yuav cias nyob nrog koj txhawb kev txij kev nkawm os. Tsis cais koj kev nom kev tswv, yuav cias txhawb koj vaj koj fwv lau. 

[B]. Cais Thiab Nquam Mob Nkeeg.  

1). Kuv cais no ces yuav luj lim cais li nplho niag kev qaug das qaug zog, luj lim cais niag sab mob sab nkeeg, luj lim cais niag toj taug mob toj taug nkeeg, luj lim tshem niag nkauj mob nraug aws, luj lim cais niag kev mob yas tes yas taw, luj lim cais niag kev mob plab mob duav, luj lim tshem niag kev mob plab dias hau, luj lim tshem luag niag qe zeb qes tooj qe hlau ntsia tooj ntsia hlau, luj lim rho yuav niag nyuj ciab npas fas, peb qhua neeb qhua yaig yuav rho luag kaus ncauj kaus nyas kom thim kom xam kom yaj mus tag huv li sis kom kaj os 

2). Luj lim tshem niag txhawv yaj txawv yeeb dab ntxoog dab tso, luj lim cais niag dab ntxoog dab vwm niag nywj siab tsis tiaj plawv tsis tus, luj lim cais niag nywj noj yeeb noj tshuaj tsis dawb tsis huv, luj lim niag vij sub tawg swv sub ntsha kev sib ntau sib tua, luj  lim niag sub dub sub doog kev sib cav sib ceg,  luj lim niag xyob txhiaj pem fwv kev cais txij cais nkawm kom plam tus kab, luj lim tshem niag kev qub nkauj qub nraug kom tag tu qab tu taws lau os ! 

3). Nquam tag li nrov 12 haiv mob, nquam tag nrho 12 haiv nkeeg 12 tug vij 12 tug swv 12 tug nywj 12 tsav npog, muaj tsawg ua ib zog nqa, muaj ntau ua ib zuag tsaws es, tsaws li hlo rau lawm Ntuj Niam Ntuj Txiv chaw teem mob teev nkeeg chaw sau mob sau nkeeg kom tsis pub txeej, kom ntsej tsis hnov muag tsis pom ntuj ntsiag txiaj teb ntsiag to, tsis pub rov lo sawv ua mob. 

[C]. Hu Plig Thiab Mus Tos Plig. 

Ua….. Hnub no ces yog tub kis hnub es, hnub no ces yog SivYig tuaj nqee Ntsuj nqee Plig, nqee ntsuj nqee hlauv os. Kuv yuav nqee yuav hu Pog yawg nkauj Iab Nraug Oo tus mi xeeb leej xeeb ntxwv, yuav tuaj txhawb tuaj tsa Pog Yawg Txwv Zeej Txwv Koob, nws Pog nws Yawg nws Niam nws Txiv tus Tub tus Kis, mis Tub mis Ntxhais ( Npe:………Niam Txawj Vam Lis …………..) no es  nws ib tug ntsuj 3 tug pilg, Ib tug ntsug 32 tus hlau, kom ntsug cus ciav kom hlauv cus plaws: 

1). Hnub nram ntej is os ( Npe: ………..………….) no nws mi ntsuj tau ceeb mi plig ce dhia li rhees, mi ntsug tau ntshai mi hlauv ces poob rau yas kab qaij qaug li yeev rau tej yas kev lawm lo Kuv txiv ntsug txiv plig leej Tub SivYig yuav nqee yuav hu kom sawv li tsees rov lo Vaj lo Tsev oh os ( Hu txhua yam ntawm kev ceeb ntshai ). 

2). Tsa ntsug tsa plig ntawm lub lav mob nkeeg. 

3). Tsa ntsug tsa plig qaug rau hauv vaj hauv tsev kom txhua. 

4). Tsa ntsug tsa plig rau kev mus ua si, khwv noj khwv haus, ua laj ua kam, ua das ua zog, ua nom ua tswv. 

5). Mus tos rau kev mus cuag pog cuag yawg. 

6). Mus tsa kom tawm ntawm qhov hleb qhov ntxa. 

7). Hu qhua neeb Plig ( Yog nws muaj kev neeb kev yaig). 

[D]. Qhib Koob Hmoov Thiab Sam Koob Hmoov Rau Nws. 

Hnub no zoo hnub, hnub no zoo sij hawm, yog hnub dawb yog hnub huv os, yog hnub Niam Txiv Pog Yawg, Kwv Tij Viv Ncaus, Phooj Ywg SivYig kev hlub kev pab, yuav tuaj khib koob qhib hmoov, sam koob tsaws hmoov rau ( Npe: ………................ ) no es: 

1). Qhib li plho  ( Npe:…………………...) no nws Peev ntaub noj ntawv haus seb os: 

1. Sam li zog Teem Caij Teem Nyoog 120 xyoo rau nws plooj ntaub caij ntawv nyoog kom txhij kom txhua tsis pub seeb kom tsis pub ntuag. 

2). Qhib li plho ( Npe:…………………..) no nws txhab koob txhab hmoov seb os:  

1. Txhab li zog koob hmoov, tsaws li zog koob kis rau nws plig koob plig hmoov kom puv li npos seb os. Nws yuav noj tsis khees tes haus tsis kheej qub. 

3). Qhib li plho ( Npe:…….……………..) no nws 9 txwg tub nyab 9 txwm tub kis Kev Kev muaj meej mom fwm chim es: 

1. Sam li zog kev muaj nyiaj pluas nuj nyiaj kub ntws sis lug lo rau hauv hnab lo rau hauv nas. 

2. Txhawb li zog kev nom kev tswv kev Vaj kev fwv, kev phooj kev ywg kom tshwm kom txog, kom txais tau lau ! 

4). Qhib li plho ( Npe:……....…………..) no nws ntaub neeb ntawv yaig seb os:  

1. Qhua neeb qhuas yaig qhua nom qhua tswv, muaj ib txwm lo tsis txwm 

Kuv tos kom tshwm rau saum lub fws, los nyob thaj nyob ntxhees 

2. Yuav luj lim kom tau tus meej tus tseeb, lub fwj chim lo kho yaj kho yeeb lau ! 

[E]. Koos Koob Hmoov Koob Kis Rau Hauv Vaj Hauv Tsev. 

1. Koos li nkaus ( Npe: ………......…….. ) no es nws mis ntsuj duab ntsuj Plig ntsuj mam huv tib sis lo txhawb lo tsa nws cev ntaj Xib ntsug, lo rau hauv Vaj hauv tsev lau ! 

2. Koos li zog txhawb tag nrho yeej koob yeej huam rau ( Npe:…………….... ) no nws tej quas npab, txhawb tag nrho rau nws tej quav tes seb. 

3. Koos tag nrho rau nws Ntaub Noj Ntawv Hau, Plig Koob Plig Hmoov, rau nws Kev Noj Kev Haus, kev muaj nyiaj muaj txiaj rau hnab lo rau nws nas. 

4. Koos tag nrho nws Meem nom meem tswv kev Vaj kev fwv lo rau nrhuab Vaj lo nruab Tsev lau ! 

Zoo Siab ! 

Xaus lis no